21.04.2006 Scree vuê a Udin pe edizion 2006 dal “
Far East Film Festival”, la plui grande rassegne cinematografiche europeane dedicade al cine dal Lontan Orient. La manifestazion, inmaneade dal
Centri Espressions Cinematografichis, e larà indenant fintremai i 29 di Avrîl alì dal teatri “Zuan di Udin” e dal cine “Visionario”. In dut, a saran proietâts 73 films, compagnâts di presentazions e incuintris cuntune cincuantine di personalitâts dal cine asiatic. Al centri de edizion di chest an e je une retrospetive titulade “La Asie e cjante!” formade di 19 films, che a van dai agns ‘30 ai ‘60, e che e à chê di fâ cognossi miôr la comedie musicâl: un gjenar di grant sucès intal cine dal Lontan Orient. Cun di plui si varà une zornade dedicade dute ai cines dal orôr e une serade sul cine erotic gjaponês. Inte suaze dal festival si varan ancje dôs mostris dedicadis une ai posters cinematografics e une aes fotografiis dal regjist Johnnie To. La manifestazion si vierç cuntun film in prime mondiâl (
Imprint) dal regjist gjaponês Miike Takashi e si sierarà cu la proiezion in prime vision europeane di un film sudcorean (
Welcome to Dongmakol) di Park Gwang-Hyun.
