12.08.2006 Daspò mês di tratativis, cun siopars e taulis di conciertazion saltadis, îr di sere e je rivade la firme dal Compart Unic regjonâl 2002 – 2005, che al cjape dentri sù par jù 3 mil dipendents de Regjon e 12.700 dai Ents locâi. dai dipendents publics. Di dutis lis organizazions sindacâls, dome la CISAL no à partecipât ae firme dal contrat. Dut câs, par metilu in vore, si varà di spietâ la fin di Setembar, daspò dal parê di ANCI, UPI e UNCEM e dal esam de Zonte regjonâl e de Cort dai Conts: dome in chê volte, se no saltaran fûr problemis, si rivarà ae firme definitive. Il contrat al regole la mobilitât dal personâl di un Ent a di un altri, al previôt paiis plui altis dai dipendents dai Ents locâi, e al fâs stât suntune spese totâl di 38 milions di euros. Par Pierangelo Motta, de CISL-FPS, il risultât otignût al va a bon pro dai lavoradôrs e al garantìs servizis miôr pai citadins. Giancarlo Valent, de CGIL-FP, al à comentât che al è un bon acuardi che al rispiete lis dibisugnis economichis sei dal personâl, che des aministrazions publichis. Par Maurizio Burlo, de UIL-FPL, si trate di un bon compromès a pro dai lavoradôrs. Il coment di Fabio Goruppi, de UGL – Ents locâi, al è che plui di cussì no si podeve otignî.
