03.04.2008 Al è timp fin ai 7 di Avrîl par iscrivisi al master di secont nivel – cors di inzornament “insegnâ in lenghe furlane” inmaneât de Universitât dal Friûl cu la poie finanziarie de Agjenzie Regjonâl pe Lenghe Furlane. Il master al è stât presentât vuê, te sede universitarie di Palaç Antonini, de diretore e de codiretore, Piera Rizzolatti e Alessandra Burelli; dai presidis de facoltât di Siencis de Formazion, Franco Fabbro, e di Lenghis, Antonella Riem Natale; dal diretôr dal ’Ufici scolastic regionâl, Bruno Serravalle, e dal diretôr dal Servizi identitâts linguistichis e coregjonâi tal forest de Regjon, Marco Stolfo. La iniziative formative e je indreçade a insegnants e educadôrs des scuelis de infanzie, primarie e secondarie. L'obietîf dal cors – e à spiegât Rizzolatti – al è chel di dâ ai insegnants cognossincis culturâls, sientifichis, linguistichis, didatichis e di competencis operativis di fonde par doprâ la lenghe furlane in forme veicolâr tant che a davuelzin lis ativitâts previodudis dai curricula scolastics. Il cors al tacarà sul finî di Avrîl, al durarà 21 mês e al à un valôr di 60 credits formatîfs. Il manifest dai studis e il modul di amission a son disponibii in linie ae direzion:
http://www.uniud.it/didattica/post_laurea/master/secondo. A puedin iscrivisi chei che a àn un titul di lauree magjistrâl o dal ordenament vieri e chei che a àn un diplome di scuele secondarie superiôr e che a son o a son stâts in servizi in struturis educativis. Cun di plui e ven domandade la cognossince almancul orâl de lenghe furlane.
