06.05.2008 Al cole vuê il 32esim inovâl dal taramot che tal 1976 al à fiscât in Friûl causant un miâr di muarts, miârs di ferîts e mudant a fuart la muse de nestre tiere. A son tantis lis manifestazions che si fasaran usgnot, massime tes zonis plui colpidis dal Orcolat, par memoreâ l'inovâl dai 6 di Mai. A Glemone messe a 8 di sere e po prucission fintremai tal simitieri; a Buie si partìs a 18.30 de glesie di Ursinins piçul par rivâ a 7 in Domo; a Osôf a 19.30 riunion fûr dal palaç dal Comun e po a 8 messe; a Forgjarie messe a 7 intal cjâf lûc, a 9 a Curnin. A Vençon messe in dome a 9 di sere e po prucission de popolazion tai simitieris; a Montenars, invezit, messe intal daspomisdì; ancje Dartigne e ricuardarà i siei muarts a 8 di sere cuntune messe. La Associazion dai Comuns taramotâts e dai sindics de ricostruzion – come che al spieghe Franceschino Barazzutti – e je cumò impegnade a meti sù a Vençon une mostre-laboratori sul taramot e su la opare di ricostruzion che i è vignude daûr. A ricuardâ chest inovâl cuntun minût di cidin al è stât ancje il gnûf president dal Consei regjonâl, Edouard Ballaman, che propit vuê di buinore al è stât elet intant de prime riunion de Assemblee.
