Cormôr Salvadi e Zornade europeane des lenghis

25.09.2008 La partence de edizion 2008 di Cormôr Salvadi – manifestazion inmaneade dal circul Il Cantîr di Mortean che e rapresente une sorte di vitrine su la creativitât artistiche in lenghe furlane – chest an e cole juste inte Zornade europeane des lenghis (26 di Setembar) e un pôc dut il so program al zire ator de promozion dal plurilinguisim e de comprension interculturâl. La serade di vierzidure (si tache a 9 sore sere) e ufrìs i concierts dal grup ocitan “Sam Karpienia”, dal musicist furlan Loris Vescovo (che al presente in anteprime i tocs dal so gnûf disc “Borderline”) e de ospite canadese Julia Kent. Sabide ai 27 di Setembar, simpri a 9 sore sere, ancjemò concierts cu la carinziane Lisa Stern, la furlane Priska e un dj set cun Mojra B e Stregaelisa. Intant de manifestazion si podarà viodi in vore i scultôrs Edi Carrer, Nico Colle, Pablo A. Garelli, e Alvise Santin inte suaze de iniziative “Spicepiere”. Cormôr Salvadi al larà indenant ancje ai 3, 4 e 5 di Otubar (cu la anteprime dal disc di R.esistence in Dub, i concierts di Bande Tzingare e Fabian Riz Orquestra, il dj set di Pansilecta e di Lak, la Gnot Hybride cul grup american Mahjongg, i furlans D.S.P., la animazion pai fruts “O voi ator pal prât” e il Teatro Incerto cul spetacul “Bessôl: un arbitro tal bunker”). Il program complet de manifestazion si pues cjatâlu sul sît www.festintenda.it .
Nol è dome Cormôrs Salvadi, dut câs, a ocupâsi de Zornade europeane des lenghis. Lis iniziativis dedicadis a chest apontament, di fat, a tachin za joibe ai 25 di Setembar cu la presentazion dal libri “Il cjasâl dai animâi” di G. Orwell (6 sot sere, sale Ajace, Udin, a partecipin il tradutôr Luca De Clara, Silvana Schiavi Fachin e Mauro Daltin) e po a van indenant tal vinars cu la taule taronde dal CIRF su la diviersitât linguistiche e il dialic culturâl (5 sot sere, sale Florio di palaç Florio, Udin) e cu la iniziative inmaneade de Provincie di Gurize su lenghis locâls e ricetis tradizionâls (5 e mieze sot sere, pal di Cors Verdi, Gurize). Sabide ai 27, invezit, si fevele di lenghis minoritariis e turisim alì dal centri culturâl “Ta Rozajanska Culturska Hisa” (9 di buinore, Resie).